“Bakutel2018” sərgisi bu il daha maraqlı!

4-7 dekabr tarixlərində Bakıda “Bakutel 2018”- “4-cü Azərbaycan Beynəlxalq Telekommunikasiya,İnnovasiya və Yüksək Texnologiyalar” sərgi və konfransı keçiriləcək. Bu gün “Bakutel” sərgisi yalnız sürətlə inkişaf edən texniki nailiyyətlərə həsr olunmuş bir sərgi deyil, həmçinin, müxtəlif İKT sahələrini təmsil edən mütəxəssis və peşəkarları toplayaraq, iqtisadi və sosial rifahı təmin etməkdə mühüm rol oynayan, bütün fəaliyyət sahələri üçün geniş imkanlar və son inkişafları təklif edən və əhalinin həyat səviyyəsinin artırılması üçün unikal bir platformadır. Bu il sərgidə dünyanın 20 ölkəsini təmsil edən 200-dən artıq şirkətin iştirakı gözlənilir. İştirakçıların arasında İKT şirkətləri, mobil operatorlar, rabitə operatorları, internet provayderləri, sistem inteqratorları, tanınmış brendlərin distributorları və gənc ixtiraçılar iştirak edəcək.

Sərgidə ilk dəfə olaraq, “Silk Way” Biznes Aviasiya şirkəti öz stendində təyyarə üçün yeni bir laboratoriya təqdim edəcək: ATR 42-500. Bu gəmi üçün yenilik Sokkia GRX1 cihazında gerçək zamanlı kinematik metodundan (RTK) istifadə edilən geodeziya çəkilişidir. Sərginin dörd iş günü ərzində dolğun və çoxtərəfli işgüzar tədbirlər proqramı keçiriləcək. Tədbirdə müxtəlif konfrans və görüşlərin keçirilməsi planlaşdırılır. “Bakutel Tech Talks” adlı yeni formatda açıq müzakirələr təşkil olunacaq. Mövzular çox maraqlıdır. Biz bilirik ki, dünyanın nəhəng İT şirkətlərində də bizim həmvətənlərimiz çalışır, sessiyaların biri məhz Google, LG, Facebook, CERN kimi iri şirkətlərdə çalışan bizim həmvətənlərimiz öz uğur hekayələrini və ən son trendləri bizimlə bölüşəcəklər. Həmçinin, “Bakutel” sərgisi çərçivəsində “B2B” formatlı görüşlər də təşkil olunacaqdır. İşgüzar görüşlər və danışıqlarla yanaşı, sərginin bütün ziyarətçi və iştirakçılarını xoş sürprizlər, eləcə də müsabiqə və viktorinalar gözləyir. İlk dəfə olaraq “Bakutel” sərgisində alman alimlərinin ixtirası olan ultra-modern texnologiyası əsaslı “Robokiper” təqdim olunacaq. “Robokiper” - dünyanın ən sürətli qapıçısı hesab edilir. “Bakutel 2018” sərgisinin zirayətçiləri və qonaqları “Robokiper”-ə qol vurmaqda özlərini sınaya biləcəklər. Oyun iştirakçılarına vurduqları hər bir qola görə “Azercell” şirkəti tərəfindən müxtəlif hədiyyələr və “Aloff” firması tərəfindən futbol topu təqdim ediləcək.

“Bakutel” sərgisi hər kəsə ən yaxşı nailiyyətlər və texnologiyaların qəbul edilməsi, yeni tərəfdaşlar və investorların tapılması, eləcə də biznesin inkişafı üzrə səmərəli həll yollarını təqdim edəcək.